絲絲講場：莎莎主席贏馬補番績差
莎莎（00178）主席郭少明（Simon）尋日話，港元強，兌其他貨幣如日圓、歐元都好平，於是啲人去晒第二度買嘢，佢直頭覺得日圓太過平，話過去一年累貶咗約四成。咁佢自己會唔會去日本Shopping埋一份？佢話要以身作則，留港支持本地消費，短期內唔去日本咁話。短期？即是聽講今個聖誕都唔會去。
話說莎莎中期業績唔係幾靚仔，盈利比舊年同期冇緊一大截，跌咗55%，郭主席話唔開心。佢就話好在佢隻馬「美麗之星」前幾日贏咗比賽，心情好番啲。太太郭羅桂珍（Eleanor）就話對睇馬冇乜興趣，加上老公咁多隻馬都睇唔晒喎。
郭太自稱着衫求其
咁郭太係咪花時間心機打扮多啲呢？見佢平時出席場合每每都襯到呢。點知原來唔係喎，郭太話平時好忙，所以着衫都係求其着，冇花時間揀o架，就好似佢尋日着出嚟嗰套，佢話冇特別揀，純粹合眼緣咁話。
余絲韻