北水頭等倉:順風潔能小注跟炒

本來美息轉變在即,環球市場已陰雲密布,冷不防來個恐襲,市場避險情緒急漲,恒指低開失守22,000點關,埋單唔見三百幾點。

A股擬重啟IPO,相信上大人行得呢一步,唔會畀佢有咩差池,特別係今次同時已改咗遊戲規則,抽新股中獎先至要科水,咁就可以大大減少因抽新股凍結大量資金影響市場流動性。

電動車股突發圍

昨日雖然係跌市,但亦不乏跌市奇葩,好似電動車充電樁概念的泰坦能源(02188)升7.6%,收報1.69元;中國動力控股(00476)升4%,收報0.52元。

新能源股中,中國電力新能源(00735)升3.9%,順風清潔能源(01165)升4.3%,收報2.39元。順風股價由52周高位7.65元回落至最低曾見1.6元,一路坐貨冇走都咪話唔傷!

七月急跌以來,順風股價維持在2至3元水平上落,昨日逆市做好,成交回升,是否醞釀消息,不得而知。

早前本欄曾提過,順風收購咗一家德國太陽能企業,拓展海外市場,另投資一家從事儲能電池管理技術公司股權,到底呢兩方面有咩新進展,值得關注。

純睇走勢的話,短線支持位在2.2元水平,小注跟炒首站阻力在2.6元水平,若要突破3元關,須有利好消息作配合。

司慕渢