絲絲講場：王曉初愛將做齊電訊三雄
周三晚中電信（00728）突然公布，原副財務總監、公司秘書兼授權代表翁順來，因個人工作變動原因，將於十一月一日起辭任。聯通（00762）周四就隨即宣布翁順來將於十一月，接替已喺聯通任職近十年的朱嘉儀出任聯通公司秘書。翁順來嘅工作變動，亦成為三大內地電訊公司管理層於今年八月「大執位」後，首位跟隨公司舵手過檔嘅上市公司管理層。
翁順來孖實過檔
中電信周三晚宣布翁順來（洋名Jacky）嘅離任，已即時引來本港上市公司投資關係（IR）圈中人嘅談論，故事要從○五年內地電訊公司管理層執位，王曉初由中移（00941）過檔中電信講起。
早喺王曉初執掌中移年代，Jacky已係王曉初嘅IR重臣。而王曉初○五年轉去中電信幾個月後，Jacky又「機緣巧合」地加入中電信帶領IR團隊，而喺Jacky與團隊嘅努力下，中電信更成為其中一家獲得最多投資關係獎項嘅本港上市國企。
有IR圈中人指出，自王曉初再由中電信調任至聯通後，Jacky已向外表示希望可跟隨王曉初加入聯通，今次成功過檔，佢更成為少數能先後出任內地三大電信公司高層嘅土生土長香港人。IR圈亦開始猜測，聯通原公司秘書朱嘉儀會否亦會跟舊上司常小兵過檔，轉任中電信嘅公司秘書呢？
余絲韻