想打Botox同整牙，不妨去開菲律賓或印度時順便，因有私人銀行出咗份財富報告，幫你「格咗價」。
話說瑞士寶盛私人銀行最新財富報告有個「高端生活指數」，調查咗十一個亞洲城市入面嘅High-class商品同服務價格。結果上海榮登今年「最貴」城市，香港同新加坡就排第二同第三位。究竟呢啲城市有咩咁「貴」？一個打Botox報價就睇到。
以打Botox等臉部醫療美容為例，上海使費最貴，平均要10,085元；香港都唔平，盛惠大概6,800幾蚊。咁去邊度打好？嗱，最平係馬尼拉，大概1,200元就有交易，打八次先等於上海打一次。齋講使費咋，效果有冇八倍差別？絲絲就唔知喇。
香港住宅樓價冠絕亞洲已經唔係新聞，不過估唔到睇牙原來都幾傷荷包。香港睇牙使費僅次日本，成為亞洲「二哥」，盛惠平均35,000幾蚊。想整吓牙，可以考慮去最平嘅孟買，約8,000幾蚊就得。不過都係嗰句，風險自理。
余絲韻