絲絲講場:王石攀山「死」過兩次

萬科(02202)主席王石尋日嚟咗香港,同科大學生講生命亦講中港矛盾。原來死神曾經搵過王石,仲有兩次咁多,兩次都係登珠峰。

知識大山難過珠峰

○三年佢52歲第一次闖珠峰,竟然氧氣筒缺氧,要靠意志登頂,仲要執攀山遇難者用剩嘅氧氣筒嚟用,先撐住落到山,佢呢次亦創咗中國登上珠峰頂最年長紀錄。

第二次係佢59歲,呢次因為缺氧,搞到對眼短暫失明,摸黑咁落山。佢嘅體會係「就是因為怕死才要登山,面對它才學會珍惜生命」。

王石今年64歲,本來打算70歲再登珠峰,不過四年前佢返學堂讀書,去完哈佛去劍橋,依家就喺牛津讀緊有關機械人嘅嘢。佢覺得知識山峰仲難攀過真正嘅山峰,所以依家專心挑戰知識。

在港曾遭司機鬧爆

講到中港矛盾,尤其係遊客方面,王石話明白香港人感受,但希望雙方可以互相理解。佢仲自爆,多年前初次嚟香港,搭的士時沿途飲完汽水,順手開窗就扔個罐出街,司機嬲到幾乎罷駛,仲嗌埋交。當時王石唔覺得有問題,心諗內地個個都係咁(口架)啦。今日王石當然已經戒咗呢個習慣,佢話呢個係社會文化問題,以前內地經濟唔太好,有啲現象係可以理解嘅。

王石真有魄力,絲絲佩服。

余絲韻