絲絲講場:以色列IT人來頭猛

以色列身處戰事連綿嘅中東,軍人自然多,軍人退伍後搞咩多?原來唔少精英加入高科技產業貢獻國家,當地數碼保安可以話全球數一數二,唔少出口技術保安系數達到「軍用級」。

絲絲尋日出席以色列FinTech(金融科技)論壇,場內十間來自以色列公司,有七間提供數碼保安、網上保安服務,香港買家都話「以色列啲保安真係堅」。

軍人出身 發展高科技

喺論壇參展、研發藍芽通訊嘅Wisesec代表話,公司有25個人,除咗佢,其餘24位都係工程師,大部分之前都係行軍嘅,好處當然係大家一Team人做事嚴謹,唔好處係CEO之前都係從軍嘅,有咩事要討論嘅話就……老細係軍人出身,聽到個心都離一離。

其實以色列人口唔多,得八百幾萬人,由於身處地區長年烽煙四起,軍事競賽一定唔少得,喺政府大力支持下,過去十年高科技產業角色舉足輕重,當地軟件開發同通訊都係世界頂尖,亦經常被譽為硅谷。

余絲韻