男人最怕點樣嘅女人？聽講係叻嗰啲女人。唔單止係美國嘅《經濟學季刊》咁講過，連另一份下個月會全面發表嘅研究亦一樣咁講。
呢本季刊之前登過篇研究，發現大部分男士喺Speed Dating（極速約會）時，都抗拒啲叻過自己嘅女人，理由係男士怕被高質女士拒絕。個研究同經濟有乜關係？係咁嘅，拍拖識仔識女係社會行為，但從另一角度嚟睇亦係市場行為，事關一樣講供求，兼量化得到。
另一個嚟緊下月會全面發表嘅研究，結果又係同之前嗰個差唔多。呢次個實驗分成兩部分。上半部齋畀受訪男士睇啲女士嘅數學與英文成績，啲男人都覺得女人愈叻嘅愈吸引；到實驗下半部，先畀啲男士做「智能測試」，再畀佢哋埋身見面，只要一話位女士測試叻過佢，男人即刻卻步。
結論係，男人口講話鍾意同叻過自己嘅女人拍拖，到真埋身實情係怕怕咪搞，理由聽講係怕自尊受威脅。嗱，絲絲事先聲明，以上講緊嘅係凡人，非凡人唔計。
姊妹們，畀人拒絕咗一千次，可能只係因為你哋太叻。兄弟們，呢招高，學嘢啦。
余絲韻