絲絲講場 :亞勢CEO改英文名主席落足心機
亞勢備份軟件（08290）擬以配售形式喺創業板上市，公司行政總裁莊小霈講起自己個洋名「Schubert」嘅由來，佢話，主要係阿爸（亦即是公司主席）莊景帆配合佢中文名「小霈」個音嚟改。
尋日一聽Schubert個名，諗起奧地利嗰位舒伯特，絲絲細時練琴考琴嘅辛酸唔覺意湧咗些少出嚟，即刻透咗啖大氣。
Schubert愛音樂合晒拍
至於絲絲面前呢位Schubert，原來都鍾意音樂，又會彈結他，覺得個名幾啱自己。
講講吓，Schubert突然好緊張話「死喇，我冇喺招股書度披露自己鍾意音樂！」即刻望住公關求救，好彩公關話應該冇問題嘅，個人興趣同公司業務無關。佢話監管機構捉得嚴，真係唔敢提招股書上冇寫嘅嘢。絲絲明嘅。
至於Schubert細佬，亦即是副主席莊小靈，佢洋名「Scherring」同樣一啲都唔普通，同樣係阿爸配合中文名個音嚟改。莊主席為兩位公子取名咁有心思，佢自己個洋名就只係直譯「Chong King Fan」！
余絲韻