Market Insight：重磅銀行股無運行

近排港股十足十早排上嗰套熱門卡通電影《Inside Out》主角「阿愁」主導一樣，好消息無反應，壞消息卻草木皆兵，財新編製的PMI落到47，創六年半的新低，衰啲講，近半年中國經濟數據無邊瓣掂，股民應該早視為常態，仲係要響低位隊到阿媽都唔認得，講到尾乃哀莫大於心死。

芬佬實在睇唔到中國仲有乜「符弗」短期搞番好個經濟，自去年十一月人行減息、降準，放水不遺餘力，意想不到副作用谷高A股，國家打蛇隨棍上，想借資本市場之力抬番起個經濟，點知一場股災，打亂所有計劃。放水已過十個月時間，流動性增加對實體經濟的刺激，除樓市外，幾乎唔多覺眼，下半年仲要加埋股災後財富萎縮，金融業營收減低的後遺症漸漸浮現，實在睇唔到有乜出路。

人同此心 持有現金

股市救經濟試過，減息又出埋，習大大訪美話明唔會透過人民幣貶值刺激出口，咁到底仲有乜方法？從沉淪的中港股市可見，個市大部分玩家都諗唔到其他出路，選擇揸錢穩陣，形成一彈又引來一浸沽壓，過去一個月恒指四次彈上22,000點即刻畀人沽落嚟，並非無因。

個市可以說是全國河山一片紅，超過千四隻股票見紅。滙控（00005）沽壓極重，近30億元排成交額榜首。早排散字派70元排出血肉長城，點知頂得一時唔到一世，昨日連60元關都失守，跌1.15元收報59元，一心諗住大笨象（股齡淺都未必會咁叫）穩陣的捧場客，肯定喊得一句句。

昨日滙控沽壓咁重，斷估都係渣打集團（02888）所累，早兩日外電報道話渣打同美國監管當局和解之後，仲有同伊朗及伊朗有關連公司往來，可能要再度被罰，傳到話因為重犯，唔單止罰錢，仲可能嚴重到吊銷美元結算業務，最後結果係點？無人知。

跨國銀行怕收罰單

近年美國政府確實發窮惡般，成日搵跨國企業開刀，啱啱德國福士又被捉個正着，隨時揩過百億美元。海嘯之後，包裝毒資產轉售、洗黑錢、外匯及拆息操控等罪名，經已向多間大型銀行罰上數以百億美元，本身歐洲及新興市場經濟已經無起色，仲要成日收到美國政府億億聲的罰單，跨國銀行固然有苦自己知，近年少做少錯，愈玩愈縮，投資者亦怕晒三不五時爆出的罰錢新聞。

內地奶粉市場競爭日益白熱化，似乎未來得兩條路走，一是像合生元（01112）走出去，收購健康食品作橫行發展，或者好似雅士利（01230），在奶粉市場上擴大市佔率，透過整合提升規模效益，望能減少生產成本及優化銷售網絡。

雅士利向控股公司蒙牛乳業（02319），以10.5億元（人仔‧下同），收購其奶粉生意歐世蒙牛。蒙牛本身強項是液態奶製品，歐世蒙牛去年之前其實都處於虧損，去年其總資產4.2億元，營業收入為7.24億元，淨利潤7,900萬元。

出價固然比資產淨值高出不少，13.2倍收購價可以話平，亦可以話貴，好的角度是雅士利市盈率23.2倍，如果今年業績不是面目全非的話，應該對每股盈利及擴大業績基礎有正面的好處。話又說回頭，一三年蒙牛以124億港元，或者每股3.5港元買雅士利，今次不算低的出價，且全數現金支付，難免被外界看成是削肉還母的交易。

雅士利收購會續來

姑勿論點，進口奶粉減價戰，雅士利處於被動，於內地奶粉市佔率下跌是鐵一般事實，藉收購做大個餅同外國品牌抗衡，無可厚非，估計更大的交易，係向第二大股東法國達能收購多美滋中國資產，屆時將有機會在內地奶粉市場上佔有率三級跳，坐二望一。

老實講，執靚番檔面對激烈競爭的生意，非三兩個月可成，反而藉交易套筆現金兼賺到一次過收益的蒙牛，撇開交易一五年市盈率16倍，比海嘯平均的25倍低三成六之多，早排對手伊利股份（600887.SH）都話太平故出嚟回購，現價蒙牛真係可以諗得過。