只要肯畀錢Snapchat，應該睇完自動消失嘅圖片訊息，毀屍滅迹咗幾多件都可以翻生！說好了的訊息自動毀裝置呢？
玩得Snapchat，就係貪佢有自動毀滅裝置，啲圖啲片睇完Chat完就自動消失，睇漏眼聽唔清閣下自理，不知幾Cool。
不過，總有人又要瀟灑又唔捨得，所以Snapchat一向都有個Replay功能，畀用戶可以一日揀一條訊息翻生一次。就當自己係Orpheus，可以見多至心愛嘅Eurydice一面。Orpheus係乜？希臘神話嚟嘅。唔識？仲唔係香港教育制度嘅錯，邊會係你嘅錯。
講番Snapchat，依家只要用戶肯畀錢，0.99美金就可以揀三件還魂，畀多啲錢就揀多幾件。
以前就話一生只有一位Eurydice，回頭嗰一望幾咁哀怨，依家畀錢就Eva、Emily、Eliza任你Call出嚟回望，畀着你係Orpheus，你估你仲有幾深情，睇怕個神話要寫過。
余絲韻