絲絲講場：內地創投轉口味 玩埋偶像事業

泵水撐上海SNH48

上海偶像團SNH48背後間公司上海絲芭文化傳媒，連創投公司創新工場都有份幕後泵水，創新工場個老闆就係Google前副總裁李開復，佢喺內地創投界出晒名。李開復仲撐到行，話呢種文化產品可以造福中國，創造代表中國文化嘅網絡內容咁話。

未聽過SNH48？日本天團AKB48，識喇啩。有人就係睇準班充滿財力、無論認唔認自己係嘅宅男，於是將AKB48嘅營運模式引入內地，就喺上海創立姊妹團SNH48。呢個睇得咁準嘅人，就係久游網位前CEO王子傑。佢創辦嘅上海絲芭文化傳媒，已經成功完成兩輪融資。

能令創投落疊，梗有理由。呢班SNH48囡囡賣嘅碟、演唱會飛同商品，舊年帶挈咗公司收入有成3千萬人仔；今年仲搞埋e-commerce，即係網上睇Con兼賣埋電子花，今年收入預計飆10倍到3億人仔。豪成咁，宅男簡直係絲絲偶像。

余絲韻