絲絲講場：盛諾賣枕頭搞到上太空
以前做生意，賣嗰樣就淨講嗰樣，上世紀賣枕頭，畀你點諗，都聯想唔到太空。依家時代唔同，Sinomax枕頭賣到出晒名嘅盛諾（01418），唔單止講航空概念，甚至要派埋人上太空。
推廣總監受訓出征
話說，盛諾同搞開民航太空業務嘅環宇太空亞洲（XCOR Asia）合作，盛諾為XCOR Asia嘅太空船座椅供應慢回彈海棉（俗稱太空棉）。盛諾仲會派市場推廣總監林仕超（Ken）參加XCOR Asia嘅太空旅遊計劃，同另外11個宇航員，一七年一齊衝出地球上太空。呢次太空旅程，佢哋會去到大氣層邊緣，穿越海拔100公里卡門線，逗留5至6分鐘，整個行程一粒鐘。
咪以為上太空咁易，首先要過五關斬六將。嚟緊下個月十九至二十一號，Ken就要去荷蘭進行三日訓練，包括體驗模擬器、花式飛行機同埋戰鬥機咁。仲未完，之後再去俄羅斯做無重力訓練。無番咁上下體力同精神都過唔到關。
Ken今年32歲，體力一定冇問題。佢話以前睇唔少科幻小說，所以非常期待今次旅程，仲話可以體驗自己公司做嘅座椅太空棉添。Ken話未來產品會以「航天」定位，十至十一月仲會推出大眾可以買嘅第二代太空棉產品。果然，市場推廣總監即是市場推廣總監；果然，做生意搵食真係唔容易。
話時話，你都心郁郁想上太空？聽講，若自費參加呢個計劃，承惠22萬元。
余絲韻