絲絲講場：銀行同業結算 屈喺「渠務部」
去銀行入支票入得多，張支票之後究竟去咗邊？答案係香港銀行同業結算公司嘅數據中心，全香港所有支票同金融交易都係嗰度結算，即係埋數，絕對係香港金融活動嘅心臟。不過，有人竟然話呢個心臟似「渠務部」，點解？有得解。
廿年嚟首次曝光
今年係香港銀行同業結算公司成立20周年，佢哋嘅數據中心亦係第一次開放畀傳媒參觀。金管局總裁陳德霖就用「渠務部」嚟形容嗰度嘅同事，即係好似大廈水管，支持日常運作，平時睇唔到佢哋，留意到佢哋時，通常都係出事嘅時候。
參觀呢個「渠務部」前，手袋、電話一概畀人收起晒，影相錄音統統No。入去主機房同伺服器前，更加要經過兩道保安門，第一道門關好，先可以打開下一道門。保安嚴密程度，同絲絲之前去過嘅香港印鈔公司，絕對有得揮。
主機房有專人全年365日24小時不間斷監察運作，保持攝氏22度同50%濕度，雙重煙霧系統同供電，兼有防水感應，加埋後備電源同自動發電機，同銀行間聯繫亦以專線處理；所以近三年打風落雨都能夠保持運作。佢哋有兩個數據中心，即時同步備份，唔使驚斷線。
余絲韻