上周五內地休市，港股全日高低波幅仍有459點，不過方向就一樣，都係得個「跌」字。恒指跌94點報20,840點，國指則跌131點報9,169點，主板成交僅693億元，觀望氣氛濃厚。
至於期指日市跌87點報20,612點，低水229點，成交得5.3萬張，惟好戲在後頭，事關夜期已經係另一個世界，跌多192點，低水幅度擴至421點，收報20,420點。以為已經好慘？未算，因為上周五英法德三大歐股統統跌2%以上，而且美股再接力，道指跌多272點至16,102點收，睇怕今日中港兩地股市都要裂口低開。
策略上，考慮到內地今日復市，唔知北大人會出甚麼招數應對，加上今晚美國勞動節假期休市，都係睇多一日，少做少錯，一於以靜制動最實際。