環球股市狂冧，本港經濟走下坡，樓市下跌壓力愈來愈大。除了業主減價趕出貨外，仍有意入市的買家紛大反擊，大手鋤價。柴灣杏花邨有買家要求業主勁劈130萬元，減幅達18%。以往業主「唔係新高價唔賣」的局面，已漸變為買家「唔係低市價唔睇」。
美聯李聖智稱，港島杏花邨中層戶，實用面積499方呎，業主今年四月期間放盤，開價維持約700萬元，至近日有買家睇樓後表示有興趣，隨即進取還價，還價幅度高達18%，要求業主劈價130萬元以570萬元賣出，惟業主未首肯。
世紀21日昇蔡玉駿亦稱，北角城市花園10座高層E室，屬望煙花景的樓王戶，實用面積約1,010方呎，業主原叫價1,680萬元，但上月已減價80萬元，至1,600萬元，但有睇樓後的買家嫌「未夠喉」，大手還價至1,400萬元，但最終被業主拒絕。
豪宅亦不乏鋤價個案。利嘉閣鄭雲鋒指，跑馬地豪宅雲暉大廈A座中層四房大宅，實用面積約1,955方呎，連租約放盤，業主向來「企硬」，叫價6,000萬元，但有買家還價至500萬元。惟業主見每月仍可收租逾10萬元，表明不會賤賣單位。