唔到你唔信邪，絲絲唔係講農曆七月，係講「秋官效應」又靈驗，尋晚「秋官」鄭少秋主演套電視劇《誓不低頭》播大結局，你估套劇七月三十日起重播到完呢段期間，恒指跌咗幾多點？1,000點？2,000點？答案係足足3,657點，累計跌幅超過14%！
而今年四月重播《大時代》期間，港股只係累跌569點，算係好收斂嘅「秋官效應」。
《誓不低頭》播完，散戶Clay就話：「關咩事！呢啲都係講吓啫！套劇播足四星期，跌得嚴重嗰幾日就講，升又唔提。我就唔理呢啲效應。」散戶陳先生話：「呢啲嘢迷信啫，中到咪你好彩囉！」
依家入唔入市？散戶馮小姐話：「市太Chok，未敢買貨，一動不如一靜。」對於「秋官效應」，仲敢唔敢「誓不低頭」？
余絲韻