「萬里長城長又長，我倆友誼比它長」、「黃金堅，鑽石堅，不及我倆友誼堅」，就係紀念冊呢幾句，絲絲自小學雞就曉得友情係幾咁虛無；今時今日，絲絲見識到內地互聯網發展成宇宙最強，人脈關係直頭可以量化兼套現。
想借錢，機構一般睇吓有冇卡數、有乜負債咁；內地互聯網金融就睇你有幾信得過？要計「信用分」。
除一般資料外，會睇你網上買咗乜金融產品、淘寶淘過乜價錢、社交平台填乜學歷、網上打乜Game、QQ定位顯示你蒲開邊、仲睇埋你微信朋友圈有乜Friend。
啲「信用分」唔單止可以用嚟晒，仲實際有用。只要夠高分，租車租酒店時可以免按金，連網上申請外國簽證都可以慳手續交少啲資料。
呢啲「信用分」，就係個人嘅信用證明。內地「個人徵信」（個人信用證明）業務，以前只有央行獨市，但年初決定開放。個人徵信市場值成1,030億人仔，係互聯網金融最大嘅金礦，阿里、騰訊等梗爭崩頭。
咁落去，第時為咗買樓易啲上會，除要準時找卡數，唔通仲要Add番啲「信用分」高嘅Friend添？「友情」二字幾無價，絲絲今時仍覺難捉摸，仲有絲絲小學雞紀念冊嗰句「A man and a pen, you are my only friend」，阿葉家輝同學，查實當年你想講乜？
余絲韻