絲絲講場：和美業績望「生肖」打卦

內地私家婦產醫院集團和美醫療（01509）管理層尋日係咁話，「受到中國羊年傳統觀念影響」，所以上半年旗下醫院分娩量，比舊年同期少咗14%，得676宗，收入增長都慢咗，只升2.3%。

羊年分娩率特別低

內地人點解冇咁Like「羊B」？聽講係怕羊B身體弱喎。和美醫療副總裁陳偉（William）話，十二生肖中，羊年分娩量特別低，連鼠、蛇、雞年都冇羊咁少。所以，公司今年上半年床位使用率低，於是調動啲床位做月子（坐月）中心、兒童健康服務等嚟做「對沖」，增加床位使用率。

講開，William太太當年生馬B，原來都係Join公司嘅中價Plan。佢仲話龍、馬年嘅床位好爆，特別早截Booking，佢太太當年生完馬B，一樣Book唔到月子中心，惟有喺屋企坐月。

絲絲又聽講，佢哋公司至高級嘅Package，要成30萬人仔，就算有員工八折優惠，負擔都唔輕。

若然業績真係同生肖掛鈎，咁咪唔使捧住個水晶球都睇到，龍年實盈利爆升喇啩，咁蛇、鼠年咪……計絲絲話，成世人邊計得咁清，何況係別個生命。

余絲韻