絲絲講場：覆盤唔准WhatsApp 證監被轟OUT
的士鬥Uber近期係城中熱話，一下子網上都畀「創新」、「與時並進」乜乜乜洗版。立法會議員張華峰亦有感而發，話最近一班金融界人士向佢反映，話證監會現時仍硬性規定證券行收到客戶電話落盤指示後，要講電話同客人覆盤兼要電話錄音，呢個做法實在非常Out。
電話落盤限用電話覆
張華峰話，近年啲客已經好少用電話做落盤，多數用WhatsApp或微信聯絡經紀，反問點解業界依家仍然唔可以用WhatsApp去覆盤，而一定要用電話回覆呢？佢炮轟監管機構若固步自封、唔肯求變，只會阻礙市場向前發展。
絲絲仲聽聞金融界醞釀同證監會講數，建議放寬畀用WhatsApp等去覆盤。
證券及期貨專業總會永遠名譽會長王國安話，依家銀行都用短訊覆盤啦，點解經紀要用電話同客人覆盤，係咪大細超？短訊，同WhatsApp或者微信又有乜分別？就算電話有錄音都可以搵人假扮啫，如果要100%肯定客人身份，證監會不如規定要用指紋或者驗DNA。明寸證監會！
接盤最憂黑客作怪
王國安話，明白證監會要保存交易指示紀錄，一旦出事，可以追查到，所以佢哋就建議保留WhatsApp或者微信覆盤嘅內容以作紀錄。
咁證監會點睇？有市場人士問過可唔可以用WhatsApp接盤，因為WhatsApp都係來自個客嘅電話啫！但證監會就話唔多安全，話好易畀黑客入侵，有唔少漏洞咁話喎。
今回真係To WhatsApp, or not to WhatsApp：that is the question。證監會發言人就話NO COMMENT喎。
余絲韻