北水頭等倉：中鐵短線有力再上
昨日中港兩地股市繼續大玩過山車，尤其是滬綜指午後一度倒跌，當大家都心亂如麻之際，臨近尾市竟然華麗轉身升穿3,000點收市，最終收報3,083點。恒指近尾市仲抽穿早市高位，藍籌股僅蒙牛（02319）下跌，唔通個市真係見底？
平心而論，今次人行出雙降都無乜效用，到隔晚美股急抽，中港股市至有運行，市場情緒仍然起伏不定，故後市仲係要小心行事。
基建項目需求大
板塊方面，軍工概念股借勢翻炒，中國飛機租賃（01848）同航天控股（00031）就升得最爽，分別抽高17%同12%。另外，比亞迪（01211）受惠於上半年業績表現理想，期內盈利按年增29%至4.66億元人民幣，勝市場預期，股價亦大升9.6%，並帶動整個板塊上揚，北京汽車（01958）、和諧汽車（03836）及吉利汽車（00175）都升5至12%不等。
但要留意，由於內地汽車業競爭加劇、經濟放緩影響行業前景亦是人所共知，而這類因素並非一時三刻能改變，故汽車股短炒可以，長揸就真係要諗諗。
至於昨日另外一個強勢板塊就係鐵路基建股。無他，國家隊救市眼高手低有心無力，未來靠大搞基建保七幾可肯定，加上中國為亞投行舵手，推動「一帶一路」唔可以失威，故昨日尾市見中國中車（01766）、中鐵（00390）、中鐵建（01186）及中交建（01800）都愈升愈有，若以走勢計，就以中鐵最啱博反彈。
首先，中鐵股價近期在6.4元守得幾穩，加上昨日股價重上250日線，9日RSI彈到49.5貼近中軸，MACD短期更有機會轉牛，走勢回暖；其次，以昨日收市價計，中鐵H股較其A股平39%，為上述四隻股份AH差價之冠，都算係另一個賣點。如果股價上番八月高位8.4元，回報都算唔錯。
司慕渢