Market Insight：電動車行業露曙光

昨日反彈市乃恒指50日線跌穿250日線，俗稱「死亡交叉」後的首個反彈，最強反彈目標可以睇到上50日線24,700點水平。不過，眼前係先補番個下跌裂口，企得穩喺22,200點樓上整固已算唔錯。至於A股，滬股通昨使用額度有49億人仔，四個交易日使用額度超過287億人仔，睇嚟真係有外資人棄我取，暫時先觀望，好淡倉都唔使心急開住。

人仔貶值，除咗內地資產價格承壓外，周邊國家亦感受到壓力。好似進口越南橡膠，人仔貶值後進口貨比內地生產的更高。別無他選之下，大家鬥貶係自保之法，且可以預示到，中國與周邊國家關係會變得緊張，正所謂「因財失義」﹗

講番市況，藍籌股只有一隻低收，就係蒙牛（02319），收報28.9元，跌3%，主要係中績表現遜預期，且公司預計下半年原奶產能過剩情況持續。惟蒙牛股價由次季高位51元反覆回落至30元樓下，短線27元是雙底支持所在，即使在極端市況下失守，相信24至25元有好大承接。若然睇好內地乳業重組兼併，作為行業龍頭的蒙牛，長線可以開始部署分注收集。

中海油策略正確

藍籌股最靚仔係隻中海油（00883），集團宣布中期賺147.3億元人仔，跌56%，期內平均實現油價為每桶57.53美元，同比大跌45%。老實講，國際油價跌成咁，中績盈利倒退就預咗，反觀實際出嚟的數字叫做略勝預期，且維持派發每股中期息25港仙，即派息比率變相上升，對長期捧場的小股東，都算係一個好消息。

到底油價到底未？睇供應下半年有增無減，只是因基數已大減，跌幅可能會收窄。為應付行業困境，中海油大削資本性開支係正路做法，且嚟緊策略會由過去首重銷量增長及海外收購，改變為首重回報（即減資本性開支、控制成本及提升生產效率），方向正確，難怪股價咁醒神，升14%收報9.22元，股價大成交回補了周初的下跌裂口，短期料會先在9至10元水平整固。

同樣因業績消息刺激股價一洗頹風的仲有比亞迪（01211），股價一度高見32.8元，收報32.25元，收復10日線。睇番份成績表，半年賺4.67億元人仔，對於一家市值達295億元的上市公司而言，呢個利潤金額唔算好多，但以其過去兩個財年純利分別只有5.5億元及4.3億元人仔，則半年賺4億幾都唔錯。

比亞迪漸入佳境

期內汽車業務銷售增長四成，手機相關業務銷售按年升3.3%，光伏業務則跌8.5%。由於內地智能手機市場增長開始放緩，下半年手機業務平穩已不俗，二次充電及光伏業務壓力未消，故下半年焦點都係落在汽車業務身上。

汽車業務中，傳統汽車市場競爭激烈，唔係比亞迪那杯茶。上半年公司的新能源汽車銷量約兩萬輛， 在內地新能源汽車市場的佔有率接近30%，表現令人鼓舞。管理層預計下半年新能源汽車銷量會增至4萬輛，產銷上的規模效益可期。雖然油價下跌較有利傳統汽車銷售，但內地行業政策向本土新能源汽車製造商傾斜，比亞迪作為龍頭，未來業績應可漸入佳境。

比亞迪股價已由次季高位大幅回落逾半，波幅叫人吃不消。不過，論估值，股價跌至25至30元區域，再沽的理由並不多，只是季內反彈40元關又頂到實，策略宜在30元或樓下買，接近40元就沽，炒波幅，直至業績再有驚喜為止。

「東網money18」fb專頁搶先Like

古勝又有好介紹，「東網money18」facebook專頁已正式登場，內容包羅萬有，網友可即時分享財經資訊，助你輕鬆掌握投資亮點及趨勢，只要登入專頁給個「讚」，便可全程緊貼追蹤，與好友分享。

「東網money18」facebook專頁率先將黃國英、鄭家華及沈振盈等投資名家的文章全文上載，網友可先睹為快之外，分享及發表意見，甚至向名家留言。「學生擂台」更是不容錯過的環節，各大院校學生每周揀股比併炒技，「東網money18」 facebook專頁每天跟進股價變動，網友可即時了解各院校同學的揀股成績，更可留言給予意見。千祈咪錯過。

http://www.facebook.com/money18

古勝