人民幣貶值成為熱門話題，港元隨美元升值，投資上應該有啲咩部署呢？人稱「樓神」嘅長實地產（01113）執行董事趙國雄尋日就教人點買外國樓，不過佢講到明，自己從來唔買日本樓。
趙樓神尋日出席同系公司泓富產託（00808）業績會之後話，自己一直鍾情歐洲，喺英國同法國都有買樓收租，都已經唔係今日嘅事。不過，就算日圓之前貶值咗咁多，佢都唔會買日本樓，事關佢覺得日本樓市啲錢易入難出，皆因日本人好少由外國人手上買番日本物業。
樓神仲擺埋紀惠集團行政總裁湯文亮上枱，話「湯文亮覺得（日本樓）係好嘢，我唔知呀，你自己問佢啦」。
樓神仲話自己都有投資啲穩陣嘢，話依家時勢最好買公用股，佢自己期期iBond都有抽，最新iBond 5都入咗好多飛去抽，點知只係抽中一手，一手只能賺少少，想請大家飲茶都唔夠。聽講iBond 5入親飛都幾乎每人中兩手，點解阿樓神得一手？
余絲韻