絲絲講場：梁伯韜投資　要揀「殺手」

「品類殺手」顛覆力強

梁伯韜講緊嘅，係一啲「品類殺手」（Category Killers）式嘅企業。「品類殺手」係乜？就係嗰啲間舖大到、啲貨多到，可以趕絕晒啲小商店嘅嗰啲零售專賣店，即是賣家居裝修嘅「家得寶」（Home Depot）同「玩具反斗城」呢類。佢哋賣嘅貨類專，但單品多，小店通常好難鬥。

識揀，一定要揀投資「殺手」？點解呢？梁伯韜就話，呢啲「殺手」提供嘅服務有顛覆性、有助降低成本、提高效率，兼提高大家生活質素咁話。

講開投資，梁伯韜話自己正主力投資一啲喺前期發展階段嘅科技公司。點解？佢解釋，話自己鍾意緊貼市場同新科技發展，而且呢啲公司按調整風險後嘅回報計，回報較高。仲有樣好重要嘅係，佢話咁嘅投資幫到啲年輕企業成長，令佢好有滿足感。

喜與青年企業家互動

佢仲話，自己既係對方嘅Mentor（導師），亦同時向對方學習。

梁伯韜成日飛內地，原來佢好鍾意走訪內地啲年輕企業家，仲讚佢哋對發展自己嘅事業好渴求同熱衷添。

睇嚟，梁伯韜嘅投資心得同一般人好唔同，亦唔係只睇回報高低，不愧係一代「紅籌之父」。

余絲韻