絲絲講場：幫人贏錢陸東最滿足
星級分析員陸東出咗名測市準，好多人直頭封佢做偶像，有機會都想撲埋去請佢指點吓迷津。喺佢金融生涯中無食過檸檬？未必。佢尋日喺耀才（01428）清談節目上自爆，去求人都冇人想見佢，佢試過。幾時？就係佢幫中銀香港（02388）搞上市時。不過，亦係嗰一役，陸東話係佢做iBanker最有滿足感嘅一次。
陸東話做iBanker嘅，自己嘅獨到分析最後證實係啱嘅，就最開心，但咁談唔上係成功。
不過講到最有滿足感，要數佢做瑞銀時搞中銀香港同領匯（00823）上市，尤其係中銀香港嗰次。
話說，○二年市況好差，氣氛唔好，陸東當時要走偏全世界去做Roadshow（路演）推介中銀香港股份。「去到歐洲美洲，求人見，都冇乜人想見你，香港周街都係負資產，做乜要買間銀行。」絲絲都記得，當年有傳過大客抽飛。
「不過，最後肯落疊嘅客人，都多謝我哋。」即係點？即係佢「點」條正路人行，啲建議幫人賺到錢囉。
幼稚園年代愛上龜
陸東出名愛龜，卡片有龜嘜，發表嘅研究報告都要用埋龜圖做封面，網民直頭稱佢「龜仙人」。佢同龜結緣，原來早喺幼稚園，話說佢當年上電視台參加天才兒童節目，之前扭計，班主任為咗氹佢，就送咗隻龜仔畀佢，呢隻「第一龜」仲陪住陸東成長，到陸東成廿歲仔，「第一龜」先走。之後佢愈養愈多，依家屋企花園仲特登挖個龜池，養咗幾十隻添。
扶助弱勢「天公地道」
講到慈善，佢話自己係社會上比較好彩嘅一群，去幫啲冇咁好彩嘅，係天公地道。
佢一直支持聖雅各福群會嘅陶藝推廣，佢話自閉或智障人士造出嚟嘅陶公仔，既有細路童真，亦有靈氣。「天公地道」四個字，絲絲至Like。
余絲韻