百度一度係內地最大嘅搜尋引擎公司，十年前喺美國納斯達克上市風光一時。但依家，仲邊有人坐定定喺部PC面前，十個有九個都係用手機。百度首席執行官李彥宏上個星期都喺美國一個CEO峰會上面認衰，話自己遲咗搞移動平台。
李彥宏話，百度要跟上「移動」大趨勢，但佢到一二年先開始帶百度轉向，呢樣嘢其實應該早喺一○年就要做，遲晒遲晒。佢後悔就梗，百度剛公布嘅第二季業績比預期差，周一股價先大跌8%，周二開市早段仲跌逾17%添。時機錯失咗就冇，認錯話後悔？股民唔聽呢啲喎。
余絲韻