絲絲講場：恒生陳力生無膽發創業夢
打工好？定創業好？呢個問題，十個阿爸阿媽有九個聽完，多數會一句車埋嚟「出嚟做得嗰一陣嘢，乜做得你好辛苦咩，睇我……（下刪3,000字）」。若然你父母係剩番嗰第十個，聽完冇反應，咁你可能唔係佢親生。
做銀行吸經驗 咁就39年
若然真係想創業，就要趁早，趁自己仲曉駁嘴、唔識死，就好去闖。絲絲咁講，你唔信？連乜都見過晒嘅資深Banker都係咁講。恒生（00011）執行董事兼零售銀行及財富管理業務主管陳力生（Nixon）尋日自爆話，後生嗰陣都有創業諗頭，後尾愈做銀行就愈細膽，創業夢咁就……然後就畫上句號。
話說恒生（00011）同善導會搞咗個青年創業計劃，Nixon做主禮嘉賓，仲好坦白咁講佢親身經歷畀大家聽，佢十八、廿二嗰陣有打算過創業，但諗住自己冇咩經驗，就先去銀行做吓嘢先，順便儲吓彈藥。點知愈做愈冇膽，幾咁驚蝕錢，搞到一路都唔敢創業。卒之喺銀行一做就做咗39年。創業？再冇諗過。
中銀環保獎 有國策概念
計絲絲話，Nixon冇行創業條路，都一樣有今時今日，喺台上以主禮嘉賓身份，冇有怕咁講佢當年「幾冇膽」，佢當年創唔創業有乜所謂。
講開又講，重視企業責任嘅唔止恒生，中銀香港（02388）嚟緊亦會推出企業環保領先大獎，表揚吓香港同泛珠三角啲優秀企業，仲會設個「一帶一路」有關嘅特別獎添，同國策幾咁配合呢！
余絲韻