絲絲講場：陳國威爆郭炳聯睇中三個男人

Patrick尋日喺書展同小朋友分享讀書心得，平時做嘢嚴肅又正經嘅Patrick，尋日變得「童聲童氣」，仲教小朋友睇完啲書記得分享，唔好收收埋埋。

讀遍中西古今

講到分享，Patrick坐言起行，即場爆話老闆郭炳聯最近睇緊美國前總統林肯嘅傳記學領導才能。佢又話，郭生睇書類型廣泛，仲會「隊」好多書畀佢睇。咁Patrick自己呢？佢話最近因工作關係，睇多咗有關經濟同管理嘅書。

原來，畀郭炳聯叫埋做「讀男」嘅唔止Patrick，連傳訊總監廖國偉（Chris）都有份。Chris就係舊年畀郭生叫睇《李光耀觀天下》（One Man's View of the World）。

郭炳聯仲有睇開喬布斯嘅傳記同埋《易經》，覺得書中帶嚟好多做人道理。郭生鍾意睇嘅呢三個男人林肯、喬布斯、李光耀，風格完全唔同。林肯以慈愛寬厚見稱；喬布斯則出晒名追求完美；而李光耀就治國作風嚴厲。話時話，唔知郭生最Buy邊套呢？