絲絲講場：新地「垂直跑」郭基煇再上場？
新地（00016）上年喺ICC（環球貿易廣場）搞嘅「垂直跑」樓梯比賽，郭炳江位公子執行董事郭基煇（Adam）搶盡風頭，佢今年會唔會再跑呢？
上年，Adam喺比賽一開始，就一支箭衝衝衝，輕輕鬆鬆22分鐘就跑完全程。而男子精英組冠軍以11分56秒跑完，Adam今年有冇打算破佢自己嘅紀錄呢？
港為壓軸一站
今年賽事會喺十二月六號舉行，係新地第4年辦，同舊年一樣香港都係壓軸一站，垂直跑晒紐約、倫敦、台北、巴黎、北京、聖保羅同上海。比賽都係由起點8樓跑上ICC，終點係天際100香港觀景台，總共2,120級樓梯。
Adam會唔會跑多次就未知，不過佢阿叔新地主席兼董事總經理郭炳聯就跑咗，郭炳聯尋日主持完「垂直跑」嘅倒數儀式後，唔答記者問題就急急腳跑咗。會唔會係趁打風無乜好搞，佢換件衫去Gym Room操吓跑呢？仲有148日，依家操都嚟得切。
余絲韻