絲絲講場:長氣CEO高薪請陪跑

講開跑步,近日求職網站有一則招聘廣告,有間香港上市公司請人陪CEO跑步,開價15至25K,仲講明Fresh Grad更佳添。

跑開全馬 想練英文

陪跑嗰位,仲要英文夠好,最好英文係母語添,事關呢位CEO係想跑住步練英文,要邊跑邊傾偈,不過既要Talk得又要口密,事關CEO唔鍾意人口疏。

溫馨提示,應徵者睇嚟仲要夠長氣,事關呢位CEO本身跑開全馬,相信跑幾十公里對佢嚟講無乜難度。

算唔算筍工?未知喎,個招聘廣告無寫一日返幾多個鐘,又無講CEO鍾意朝早定夜晚跑步,但係就話明可能要成日陪佢出埠。出埠都要繼續跑,呢位CEO真係夠晒勤力。

究竟係邊間上市公司?間公司係做開時裝零售嘅,工作地點喺荔枝角。咁多貼士都仲未估到?

余絲韻