絲絲講場：債王空A股 識講唔識做
上個月初，「債券大王」格羅斯大唱沽空中國深圳指數係「一生難求」嘅好機會，話口未完內地股市真係暴瀉，深成指由萬八點嘅高位落到尋日收報11,510點，足足累插36%。正當全世界都以為債王貼中咗，今次實賺到笑啦，點之債王前兩日大爆自己其實無沽過。吓？
自辯唔熟中國市場
債王話自己貼中時機，不過就無好好執行。佢話，估計中國股市大冧會拖累美國標普500指數同新興市場貨幣，於是做咗相關部署仲有賺添。債王又解釋自己唔熟中國市場，所以「唔熟唔食」，寧願喺其他會被中國影響到嘅市場度搵食喎。
睇番佢主理嘅駿利全球無限制債券基金，上個月的確撼贏同業98%嘅基金，賺咗0.8%。原來債王喺墨西哥部署咗重倉，又沽美國國庫債券嘅短期期權，而且單計佢沽空標指就已經賺咗500萬美金。不過絲絲睇，點計都唔夠直接沽空深圳股咁和味。
貼中德債無Action
其實，債王得個講字都唔止一次，就係今年四月，佢講到德債係「呢世最好嘅沽空對象」，仲話呢次筍過索羅斯90年代沽空英鎊。當全世界以為佢隻基金實賺硬啦，點知，債王原來無重錘出擊，事後又係話自己睇中時機，只係無切實執行啫喎。
就算貼得中都無用，賺到錢先最緊要。一次係咁，兩次又係咁，到底債王係小心得滯？定係講到真金白銀時，連佢都信唔過自己嘅眼光？
余絲韻