絲絲講場：公司對決 男神床戰
今期男神戰，「宇宙最強」對「Cool魔」，鬥到上床。
以往賣床品廣告，多數搵位美女攬住張被喺張床上眼睛水汪汪咁望住你。家陣世界唔同，呢啲喺張床上碌嚟碌去嘅粗重工夫，家陣變晒由男神負責。
盛諾硬碰卡撒天嬌
唔信？你睇吓，盛諾（01418）旗下SINOMAX就搵「宇宙最強」甄子丹（Donnie）坐鎮；而卡撒天嬌（02223）新品牌「CASA-V」就搵「Cool魔」張智霖（Chilam）挨喺張床到，好足電咁用眼神問你「今晚你同邊個瞓？」。See！搵男神做招牌先係無走雞。
盛諾總裁張棟（Eric）同絲絲講，甄子丹住家好男人形象夠晒健康，所以特別邀請埋甄太汪詩詩（Cissy）以夫妻檔出任床品代言人。
另一邊，卡撒天嬌副主席兼執董鄭斯燦（Ricky）就話，Chilam靚仔時尚又人氣爆燈，婚前婚後形象一樣咁健康，與集團時尚新貴族嘅品牌主義啱晒Key，唔揀佢揀邊個。
呢場「宇宙最強」對「Cool魔」床戰，咁你揀邊個？
余絲韻