絲絲講場：德普買法乙球隊有着數
請用以下詞語組成句子：「肥媽」、LED燈、足球。「肥媽」拎住LED燈去踢足球？好明顯，你係睇開娛樂版或者毛記嘅，財經版嘅標準答案係：「肥媽」做代言人嘅德普科技（03823）雖做開LED燈生意，但就用700萬歐元收購咗法國乙組足球隊「索察」。
借道打入當地市場
大纜都扯唔埋？未必。事關德普主席李永生話，打算將球隊轄下球場轉晒用LED燈，有助打入當地二百幾個球場嘅LED燈市場。
現時隊波本身仍仲有1,300萬歐元Cash，可以搣幾年；再計埋賣球員、電視轉播、周邊商品銷售呢幾瓣，既帶嚟額外收入兼做埋宣傳。
仲有，隊波旗下嘅培訓學校，連法國前國腳杜林……個仔，都喺度學過踢波o架。
余絲韻