Market Insight:港股勢弱動力不足

睇相佬或者呃你十年八年,唔少人見個市四連升,個心紅起上嚟,古勝昨日潑冷水話唔好忽視近周A股開戶人數大減,以及人仔拆息愈升愈有,半年結水緊問題,話口未完,威咗兩日的A股再隊過,一跌就162點,唔單止10日跌穿20日線出現走勢派至驚的死亡交叉,50日線得而復失,確認中期走勢已經轉弱。

槓桿炒股,好處是升市時將收穫放大,但萬一跌起上嚟,隨時輸到入肉入骨,尤其跌得咁快,可以肯定轉唔切身又唔肯投降的股民特別多。滬綜指短短幾日由今浪高位5,178點急跌一成三,假如做緊三倍槓桿,帳面差不多已經輸緊四成。隨着中車(601766.SH)捧場客第一跳新聞曝光,A股大媽信心開始動搖之際,有迹象近幾個月唔肯跟的外資,學《大時代》劇情送班A股散戶一程。

滬股通抄底維持兩日咁大把,周三已見反手沽凸。昨日滬股通額度再次出現淨沽出,埋單剩165億元人仔,外資再掟近35億元人仔A股出街。

外資掟貨唔同你癲

本來同A股兩市每日萬幾億元成交額一比,心理影響大於實際,但至弊外資基金擺出一副唔同你癲姿態,即使短期內阿爺要搵藉口托市,例如再吹滬港通擴容,甚至加速深港通開車,大家必已心知肚明,肯真金白銀現水平入市的外資未必多,刺激作用恐怕相當有限。

A股可能見咗短期頂位,昨日尾市愈插愈急,港股都頂唔順跟住愈跌愈多,恒指最後收報27,145點,跌259點,主板成交1,185億元,下周一結算的六月期指日市收27,140點,由六月下旬大市反彈動力之弱,有小小擔心恒指如果再穿27,000點關口,應該唔止見番早前的26,553點低位咁簡單。

內地取消七成五貸存比率上限,儘管市場早從中銀監的工作會議得悉有關部署,且現時上市內地銀行之中,仲未有一間借盡去到七成五水平,不過改動之後,銀行貸款規模有機會進一步升至超越存款總量,對於中小型銀行的放貸生意靈活性,有正面幫助。

昨日大型內銀股先升後回,中行(03988)跌1.4%,建行(00939)跌1.2%,反之逆市升的有交行(03328)升0.2%,中信銀行(00998)升0.4%。

莎莎經營面臨考驗

昨日在下睇好發盈喜的富智康(02038),股價昨最高見5元,美銀美林的目標價即日到位。可惜礙於市況麻麻,最後回至4.77元收,升6.4%。

自取消一簽多行,加上更多高消費內地客,因為匯水吸引直接轉攻歐美日韓,莎莎國際(00178)截至三月底止全年業績,賺8.39億元,按年跌10.31%,每股盈利29.5仙,末期息9仙連同特別股息5.5仙,合共每股14.5仙。

期內,港澳零售銷售升3.3%至72.59億元,分部貢獻8.78億元卻跌10.6%,去年同店銷售額升2.2%。毫無疑問,內地旅客佔莎莎銷售額一個重要比重,旅客數字及消費金額放緩,對莎莎難免有負面影響。加上今年六月初內地化妝及護理用品減進口關稅,今年的情況可能更為嚴峻。從公司交出截至上周日,今個財政年度共兩個多月的數據,港澳市場銷售及同店銷售,再按年出現7.6%及5.8%的跌幅可見一二。

莎莎往績市盈率14.2倍,回顧五年來估值介乎12.5至27倍,現價處中下游水平。而去年業績稍高於綜合大行預測的8.2億元,莎莎刻下可謂勝在夠平,相信亦是昨日不跌反升主因,基於一五/一六年度上半年業績展望麻麻,短線快炒要識得落車。

快餐股估值唔算平

另一間業績麻麻而逆市微升的,仲有中環人常常幫襯的翠華(01314)。去年賺1.57億元,按年升0.88%,每股盈利11.19仙,期內收益18.01億元,增長22.21%。

翠華於一二年以29倍PE招股,之後一三年估值攀升至歷史高峰49.3倍,以昨收市價2.61元計,返到23.3倍,比大家樂(00341)的27.4倍仲要低,可見做高價快餐,唔等於估值會比中價(今日已經唔敢講大家樂屬低價)快餐高,尤其翠華一三及一四年每股盈利11.48仙及11.23仙,計埋今年連續兩年多毫無寸進,值唔值見仁見智,但卻證明當日上市時機把握上確實一絕。

古勝