絲絲講場:培力主席呻Apple Watch麻煩

新股本地濃縮中藥配方粒製造商培力控股(01498)創辦人兼主席陳宇齡(Abraham)尋日在上市記招期間,不經意Show咗佢隻Apple Watch出嚟,佢同絲絲講,自己係首批預訂,不過佢聽聞Apple又好快出新Version,介紹絲絲買平嘅款式就好喇。

咁好唔好用先?眼見Abraham每次要睇時間,都要Fing一Fing隻手,又話可以睇到Whatsapp,不過覆唔到,最後都要用番iPhone,用戶體驗好似麻麻喎。

奇虎葉青陽焗住戴

咁啱又咁橋嘅,奇虎360海外業務顧問葉青陽(David)都係「第一水」買Apple Watch,佢就嫌隻錶成日唔記得叉電,起碼要一日叉一次㗎。原來佢用智能手錶都用咗年半,對上一隻係戴Pebble,一星期叉一次電。問佢有冇後悔買Apple Watch,佢又話冇得後悔喎,唔通係「果粉」?

新版傳有視訊鏡頭

講開Apple Watch,據9to5Mac網站引述消息話,Apple Watch明年初將會推出嘅新版會搭載視訊鏡頭。不過,據講電池續航力並未顯著增加。而蘋果已表明Apple Watch會解除必需要連接iPhone 5或iPhone 6手機才可使用,希望可谷起銷量咁話。

講返轉頭,培力上市,管理層話特登訂啲靈芝朱古力畀傳媒,又強調唔係公司產品,因為公司主要製藥,絲絲講笑咁建議企業財務及投資總經理鄭學啟(Fred)開個新品牌,係做食物,佢話有得諗喎。

順帶一提,○八年時因為新世界中國(00917)聘任風波後,一直再沒公眾露面嘅前房屋署署長梁展文,佢家陣係培力嘅執行董事及集團董事總經理,佢係前年六月加入培力嘅,之不過尋日佢就無露面招股記者會喎。

余絲韻