孖妹S檔案：財俊教你經濟讀立
扮靚修身係女人終身事業，但提升內涵一樣重要！即使喺陽光與海灘嘅時刻，孖妹都照樣書不離手，仲特別享受添。《漫步華爾街》、《金融煉金術》、《富爸爸窮爸爸》……經典財經書有幾好睇，相信唔使孖妹多講，不過我哋五位財金界朋友今次話要推介近年嘅新潮好書，唔知你又睇過未？
跟分析員練好「內功」
王：易方資本投資總監 王華
推介書籍：《華爾街的肉：一個金牌投資分析師的自白》（Wall Street Meat：My Narrow Escape from the Stock Market Grinder）
作者：Andy Kessler
王：老實講，我好少睇書，因為我睇書好慢，不過Andy Kessler寫嘅書好吸引，連我都曾經追住「煲」。呢本係佢第一本著作，可以話改變咗我人生！本書描繪投行分析員嘅生活百態，寫法幽默「過癮」，完全扭轉一般人對行業嘅認知。睇完之後，仲令我都想試吓做分析員，結果我就入咗行，哈哈。我亦好欣賞作者對身邊事物嘅洞察力同敏感度。如果工具書係用嚟提升「外功」，咁呢本書應該係用嚟修煉「內功」。
孖妹評語
Kitty：呢本都唔算係新書，你唔啱規矩喎。不過，Andy Kessler近年嘅著作都唔少，算你啦！
彩兒：你同Andy Kessler嘅職途咁相似，一定好有共鳴啦。
高頻交易恐成危機
麥：財經書作家、富昌金融集團聯席董事 麥振威
推介書籍：《快閃大對決：一場華爾街起義》（Flash Boys：A Wall Street Revolt）
作者：米高•路易士（Michael Lewis）
麥：呢本書喺去年推出，以真實個案講述高頻交易，當時引起市場人士甚至監管當局嘅關注。無論係操盤定教學上，個人近年都以程式交易為主，所以我對呢本書印象較深。我認為高頻交易、程式交易都係未來大趨勢，書本適合對呢方面有深入研究嘅投資者，以及有意喺金融界發展嘅人。即使係一般散戶，相信亦會有得着，因為唔少市場人士認為，高頻交易有可能成為下一場金融風暴爆發嘅主因。
孖妹評語
Kitty： 米高‧路易士每次出書都震撼整個華爾街，我哋都係佢「粉絲」！
彩兒：《老千騙局》（Liar's Poker）同《大沽空》（The Big Short），都係佢較出名嘅作品。
13大金句論創業
黃：中大全球政治經濟碩士課程兼任講師 黃元山
推介書籍：《Zero To One》
作者：彼得•蒂爾（Peter Thiel）
金句：競爭市場賺不到錢。（Competitive Markets destroy profits）
黃：喺科技界同創投界，應該所有人都知道甚至睇過呢本書。佢唔單止適合有意創業嘅年輕人睇，其實亦適合所有投資者睇，因為投資，係投資緊一門生意，你要識得揀間好企業、知道咩為之好先得。例如書中提到，競爭未必係好事，正如中小企好難同行業龍頭競爭，反而搵到一個唔需要競爭嘅生存空間先係關鍵，先更值得投資者投資。相信本書會令讀者對好企業嘅定義改觀。
孖妹評語
Kitty：作者彼得•蒂爾（Peter Thiel）大有來頭，係美國硅谷著名天使投資者，亦係Paypal創辦人之一。
彩兒：我哋喺網上搵到呢本書嘅13大金句，句句到肉，姊妹們不妨先睹為快！
環保企業跟政策走
徐：美國克萊姆森大學經濟系副教授徐家健
推介書籍： 《Environmental Markets：A Property Rights Approach》
作者：Terry L. Anderson、Gary D. Libecap
徐：我最近教緊一個短期嘅經濟學碩士課程，同環境經濟學有關，而呢本書就係今次嘅主要教材。佢用經濟學角度解釋環保同投資可以如何並存。新商機嘅出現，普遍因為新科技興起，或社會存在不合時宜嘅政策。讀者可循呢個方向，衡量各環保企業及Startups（初創企業）嘅業務前景同投資價值。例如近年冒起、採用「共享經濟」（Share Economy）營運模式嘅Airbnb，佢嘅經營原則建基於善用社會資源。不過，有商機唔等於有得做，都好視乎政策係咪配合。
孖妹評語
Kitty：估唔到睇教科書都可以同股票扯上關係！
彩兒：政策配合先有得做？買國策股嘅股友一定深明呢個道理。
初學財務報表必讀
TR：著名地產分析師卓百德之子、獨立投資報告The Churchouse Letter編輯及研究員
Tama-Richard Churchouse
推介書籍：《巴菲特的真本事：史上最強投資家的財報閱讀力》（Warren Buffett and the Interpretation of Financial Statements）
作者：Mary Buffett、David Clark
金句：財務會計是商業世界的通用語言，除非你願意花時間去學習，否則你絕對不應自行選股。（來自巴菲特個人語錄）
TR：雖然書名聽落悶到爆炸，但內容淺白、實用，對初學投資者好有幫助，而且好快可以睇完。想投資、買股票，識睇財務報表真係好重要。我本身讀經濟出身，對財務會計唔多熟悉，每次都要花好長時間研究。可能因為咁，爸爸特登買呢本書送畀我。就算依家研究同撰寫投資報告時，我都會成日參考番本書。
孖妹評語
Kitty：哈哈，其實孖妹都好怕睇財務報表。終於有「救星」喇！
彩兒：原來作者Mary Buffett曾經係股神嘅「新抱仔」。由佢講出股神投資之道，應該比其他人更有說服力。
高妹、彩兒
若有料報畀高妹同彩兒或有嘢問，可電郵money.biz@opg.com.hk