Market Insight：房託基金穩步上揚

港股確係黑仔，四月大時代谷過一浸，牛牛皮皮足足兩個幾月，到華爾街開始消化加息預期，焦點返到經濟復甦、企業盈利改善等基本面，點知道指一發力，A股就嚟山泥傾瀉。

上周五，恒指保住65點進帳，收26,760點，着實難得，但同A股關連性比較大的國指就無咁好彩，跌77點收13,186點，在A股跌得多過H股情況下，恒生AH溢價指數由前周137.9跌番到127.5，溢價足足收窄近一成，對買入大折讓H股等大媽接火棒的，恐怕唔係幾願見到兩市差價係用呢種方式去收窄。

真係好邪，次次有從不沾股的朋友話要開戶入市，每每係見頂先兆，有舊同學早兩星期睇到評論文章，話依家A股估值與○七年高峰仲有好遠距離，想問點樣可以經滬股通入市，點知開完戶都未入錢個市就出事。

A股不能同日而語

睇番滬綜指目前市盈率及市帳率，分別係22.9倍及2.67倍，數字上，真係同○七年十月高峰49倍及6.5倍有距離，不過即使數字唔識講大話，但都要睇接收者如何解讀，尤其○七年同今日，最大分別係當年未有地方債爆煲問題，銀行亦未被阿爺點名，因為暴利要負點社會責任，成為利率市場化受害者。

同時，銀行業啱啱進入呆壞帳上升周期，今日A股金融股估值，在市場加入風險溢價之後，市盈率未及○七年的四成，四大行統統都係單位數PE，如果將這堆市值權重大的金融股份剔除，查實A股內的非金融股份唔算平，炒得最癲的創板指數PE上周雖由119倍落番嚟，但仲係百倍樓上。對比之下，今日中國經濟增長放緩趨勢未變，企業盈利增長較當年遜色，雖然低息環境及企業再投資誘因不足，令到多咗好多錢流入股市興風作浪，撇除咗口號式政策支持的話題股份外，唔少傳統舊經濟行業，其實都真係幾難揀得落手。

加息因素已被消化

聽完聯儲局議息聲明，市場對今年九至十二月加息已無懸念，但基於聯儲局講明，即使啟動加息，但目前並無條件之後幾次開會次次加，尤其今次會議調低了今年經濟增長預測，調高失業率預測，同時官員對一六及一七年年終息口預測下降，意味着即使半年內啟動加息，未來十二至十八個月，美息上調空間未必太多。

君可見，美國十年國債債息，由今年二月谷底1.65厘升至前星期高見2.49厘後，議息前後已見掉頭，上周五回到2.26厘收，比高位回落近一成。

從市場反應所見，美國即將加息的因素，基本上已被充分消化，一些早前受加息預期升溫，無風險溢價向上而受壓的房託基金，資金捧場下於上星期有回勇迹象。領匯（00823）月初已經見拾級向上，置富產業信託（00778）上周五成交額也見突破，可以見到需要固定回報投資的熱錢取態，買盤開始向其他REITs擴散。

置富持有16個私人住宅屋苑零售物業，物業組合約318萬平方呎零售樓面，涉及2,713個車位，由於主打私人住宅屋苑關係，年內受取消一簽多行或內地旅客減少奢侈品消費的影響唔明顯。今年首季，其總收益及物業收入分別升13.6%及12.4%，可供分派收益2.187億元，按年升12.8%，每基金單位分派增加12%至11.63仙，年度化分派收益率達5.9厘，頗具吸引力。

置富擴大投資組合

另一個要留意的因素，是過去兩年擴大投資組合的部署，置富基本上一年一收購，一三年購入天水圍嘉湖銀座商場，一四年投資觀塘麗港城商場連150個車位，或許受長和系重組影響，一五年暫時只賣未買，置富進行上市以來首宗出售資產計劃，售出盈暉臺物業，作價6.48億元，獲利約2億元，負債比率回到約三成二，距離45%房託借債上限，騰出新的融資空間，應有利於繼續進行收購，趁長期利率回升之勢有暫告一段落迹象，現水平應該是一個唔錯的入市時機，不妨留意。

古勝