絲絲講場：續約肯凍薪小加無蝕底

港交所（00388）行政總裁李小加剛啱續約，絲絲當然要恭喜佢啦，年薪雖然維持900萬，但嚟緊有深港通同埋構想中嘅商品通，港交所股價要升到五百蚊非難事，照咁計依家小加嘅獎勵股份價值就會接近3億，何況續約後仲會有新獎勵嘅股份送，斷估佢應該開心都嚟唔切喎！

小加獲續約3年，任期到一八年十月十五日，報酬待遇維持不變，包括年薪900萬同埋酌情表現花紅及/或獎授股份等。

不過，相信聰明嘅你可能已經發現，今次小加續約嘅最大意義唔係佢嘅基本年薪，而係代表佢所持有嘅港交所認購股權將可行使，四月起港交所股價升咗咁多，小加帳面真係賺到笑。嗰900萬年薪冇增加，當賺少個價位之嘛，獎授股份拎到盡先係重點！

原來，港交所以股份支付嘅酬金福利其實係分兩年派發，喺第二年才有首50%。例如，一三年分派嘅股份要一四年底先拎到一半，餘下一半就要一五年底才有，但提早離任就冇，現在既然續約，即唔會提早走，筆錢袋硬啦！

根據交易所資料，依家小加擁有嘅578,392股港交所股份權益，可以因今次續約而全部袋袋平安，以尋日收市價計，呢批股份就價值1.65億元！

依家小加咁多鴻圖大計，深港通、股指期貨通、商品通……相信佢都會喺未來呢3年繼續做好呢份工，順便幫埋自己份豐厚嘅退休金增值！

余絲韻

絲絲講場：續約肯凍薪 小加無蝕底