絲絲講場:小加讚證監十足無聲狗

講起漢能薄膜(00566)風波,監管上有冇人做緊嘢,港交所(00388)行政總裁李小加尋日話「不叫的狗不是不一定不咬人,這個不是說要天天出來說才能表示你的一個監管者(有)很大的權力, 不說的不一定不做,大家不要假設沒有說的事情就是沒有做。」小加呢句,用咗幾多個「不」字?幾多次雙重否定語法呢可。「絲絲Translate」幫到你。

唔出聲不表示冇出手

佢即係話,唔好以為證監唔出聲就係冇出手。即係話證監可能做咗嘢你唔知呢。

證監唔係冇做o架。話說漢能上月二十日暴瀉47%後停牌,一星期後漢能主席話冇欠銀行錢冇畀人查,消息一出,證監即刻罕有咁跳出嚟發聲明話查緊漢能。又確實冇可能吓吓要證監唱通天自己查緊乜,冇理由要證監打開口牌o架嘛。

監管唔保證市場冇事

不過,小加總裁今次話證監係「狗」,仲要係「無聲」嗰隻,人哋阿頭歐達禮會唔會嬲?應該唔會,事關係洋人心目中,狗係人類嘅Best Friend。再講,曉些少洋文嘅都知,洋人一向都稱呼啲監管機構做「Watch Dog」o架啦。仲有,小加當年修英文,又留學美國,仲喺華爾街出入咗唔少日子,唔多唔少帶啲洋風。

小加講到明,有問題,有關機構一定會監管;不過佢話,監管亦唔可能保證市場唔出事,「把市場關了就甚麼事也不會出了」。大家明嘅。

余絲韻