國企改革浪潮下，內地加油站除咗賣油，第日仲會賣嘅嘢，「前衞」過香港油站多多聲。話說中石化（00386），準備喺山西搞搞新意思，喺加油站賣埋菜。嗱，加油站做埋街市，第日揸車出去買餸連泊車位都唔使搵。
中石化嘅山西分公司，最近同當地最大有機農產品公司合作，喺中石化旗下加油站裏面嘅易捷便利店，賣埋有機農產品、烘焙產品同埋營養早餐。
賣吓包裝食品飲品咁嘅便利店仔，香港啲油站一樣有，不過講到賣埋菜，真係創意非常。中石化依家搏晒命改善油站同便利店，賣嘅嘢愈嚟愈包羅萬有，會唔會有日，賣花生油粟米油仲多過汽油柴油呢可。
余絲韻