買樓定租樓好？呢個問題，絲絲唔識答，不過恒生（00011）就揀買喇。話說恒生後勤Office原本租用九龍灣Megabox，點知被業主狂加租，前年恒生索成出29億元買起旺角成幢亞皆老街113號商廈，將成個後勤Office搬入去，成為當時九龍區有史以來最大宗嘅單宗商廈成交添。

搵咗新屋，就緊係要改番個靚名。絲絲收到風，恒生喺內部早會宣布新大樓叫「恒生113」。呢個名有得解，除咗因為位於亞皆老街113號外，「11」代表恒生個上市冧把，「3」就寓意「永恒生長」。除咗個名有心思之外，呢座「恒生113」嘅設備亦極齊全，聽聞連育嬰室都有，絕對非一般。

話時話，近排嘅當旺密碼，唔通就係「1」同「3」？長和（00001）分拆嘅長地（01113）就喺呢個星期三上市，同時和黃除牌，長和系世紀大重組就正式完成。不過，聽講集團當日唔會搞上市慶祝活動，即係見唔到李超人現身講樓講股講經濟。長地雖然用唔番和黃個「老冧」13號，但總算拎番個近似嘅「1113」號靚冧巴，集團仲會為個新靚冧巴捐出100萬元做慈善。

余絲韻