搵咗新屋,就緊係要改番個靚名。絲絲收到風,恒生喺內部早會宣布新大樓叫「恒生113」。呢個名有得解,除咗因為位於亞皆老街113號外,「11」代表恒生個上市冧把,「3」就寓意「永恒生長」。除咗個名有心思之外,呢座「恒生113」嘅設備亦極齊全,聽聞連育嬰室都有,絕對非一般。
長地為「新冧巴」捐百萬
話時話,近排嘅當旺密碼,唔通就係「1」同「3」?長和(00001)分拆嘅長地(01113)就喺呢個星期三上市,同時和黃除牌,長和系世紀大重組就正式完成。不過,聽講集團當日唔會搞上市慶祝活動,即係見唔到李超人現身講樓講股講經濟。長地雖然用唔番和黃個「老冧」13號,但總算拎番個近似嘅「1113」號靚冧巴,集團仲會為個新靚冧巴捐出100萬元做慈善。
余絲韻