絲絲講場：馬雲講數畀o靚仔拋窒

阿里巴巴主席馬雲講IT照計冇乜嘢唔識，但呢幾日佢去貴州同馬化騰、雷軍等成班開互聯網大佬峰會，自爆爭啲畀6個嚟Interview嘅後生仔考番轉頭。有乜連馬雲都知驚？就係DT。

DT（Data Technology）中文就即係數據科技，即是依家成日聽到嘅「大數據」。馬雲話，睇住幾個後生仔搬啲大數據嚟，佢哋用嘅互聯網模式同講嘅嘢，馬雲都要抖啖大氣，事關佢都唔多聽得明。不過馬雲話好彩聽唔明，因為聽得明肯定仲驚，佢仲猛話自己好彩喺15年前創業，否則一定畀呢班後生「活活搞死」。

仲講IT？Out啦。馬雲話依家係由IT時代行緊去DT時代，仲話「未來30年係人類社會最精彩嘅30年，亦係令人恐慌恐懼嘅30年」。DT大時代直頭影響成個社會，馬雲直言「未來的製造業要的不是石油，它最大的能源是數據」。

其實唔少企業已經用緊大數據賺錢，fb Like畀過喇啩？每個Like都係錢。facebook就收集用戶Like邊啲Post，預測用戶喜好，再出啲你啱睇嘅廣告。所以馬雲話「IT時代是通過對昨天訊息的分析掌控未來，而DT時代是去創造未來」。

不過馬雲警告，如果今日唔參與建設大數據，「我相信你一定會像今天一樣抱怨和埋怨」。仲諗住互聯網只係上網睇嘢、淘寶同玩Game？

余絲韻