絲絲講場：半百歲參王 臨老學英文
經常見人對呢一輩嘅小朋友搖晒頭：唔捱得、唔受得批評、一蚊都未搵到就已經話要「上車」。無你份？恭喜你。睇到呢度就走？See，都話咗啲小朋友唔話得，仲駁嘴！絲絲最近碰到恒發洋參（00911）主席楊永仁，佢今年五十歲，忽然話要學英文。關你乜事？想有嘢落袋，花兩分鐘睇埋落去。
讚王石過六十仲進修
楊永仁係上市公司主席，做咗「洋參大王」好耐，常時要同外國人溝通合作，絲絲完全冇諗過佢英文會唔得。佢好坦白話自己學歷其實得小學程度，十三歲就出嚟做嘢養家，賺到嘅就交畀董事長（即係佢媽媽）。
佢又大讚內地地產大亨萬科主席王石，話王石年過六十都仲不斷進修，佢都以王石為榜樣。
睇吓，人哋貴為「洋參大王」好耐，依家屋企Rolls-Royce又有、拉利又有、林寶又有、遊艇又有乜都有，都唔怕畀你知佢唔識英文，都仲肯出嚟講話自己都係由低捱出嚟，等你知，好多嘢肯學唔怕遲。講到尾，都係想鼓勵吓啲後生。
勸畢業生勿空想置業
講到上車，依家連工都未返嘅中學生都話要上車買樓。楊永仁就語重心長勸句，年輕人唔好成日諗住一讀完書就要有樓，因為讀完書唔會無啦啦有層樓，佢話希望年輕人先好好努力。咁佢又會留咩畀佢啲仔女？佢笑話唔使，話啲仔女自己都識搵錢。
余絲韻