Market Insight：內房回調吼位買

自四月八日阿爺畀公募基金南來「濕平」，到四月九日歷史大成交爆升，恒指破兩萬五重要心理關口後，在27,000至28,500點高位悶局輾轉拖了超過一個月，交投愈玩愈縮反映要買的買齊，新錢卻又唔多願在現水平加注。人行準已降，息已減，預期連環放水做咗，股民除了等港股自願地追補A股升幅，就只能返回基本面，睇連串的刺激經濟措施，幾時在內地各行各業上面慢慢浮現出來。

樓市短期拐點已現

對息口敏感的內房股仲係較可取，自去年十一月人行三次減息，本周內地五年期以上按揭利率落到5.65厘，超過十五年新低。睇今次減息前，四月份一、二線城市樓價回升，全國百大城市綜合樓價平均跌幅收窄到0.14%，短期拐點應該出現。

古勝冇點你

贏近三成

減息加埋樓價掉頭，可以刺激一些猶豫未決買家入市，令五、六月內地樓市溫度進一步上升，氣氛上有利，不妨把握近期高位回落，等機會再入貨，古勝睇中高位回得唔少的世茂房地產（00813）、富力地產（02777）以至炒味較濃的恒大（03333）都可以考慮。

國際調查機構IDC日前一份報告中提到，內地手機市場六年來首度走疲，首季出貨量1.1億部，比去年跌3.7%，其中智能手機跌2.5%。

手機設備股看走眼

經歷連續多年超高增長，智能手機市場開始出現飽和疲態，唯獨蘋果公司的iPhone 6大賣，仲搶埋小米市佔率一哥寶座，堪稱異數。之後見中國工信部通信研究院好似幫手機產業補飛咁樣，話四月內地手機出貨量有11%增長，至4,520萬部，其中4G機種更勁升4.7倍至3,789萬部，計落首四個月總計，出貨量有9%增長。

中國3G、4G用戶未夠1.9億，即使仲升緊，但係咪好似港人咁一年換兩次機，一年可以消耗4億至5億部出街新機，這點值得細心諗諗。內地手機出貨量放緩是意料中事，以首四個月1.54億部累計出貨量，同一四年全年4.52億部比較，完成咗一四年全年34%左右的出貨量，可見今年數據唔算標青，減價戰開始形成。

早排手機設備股股價炒晒上去，反而是在下有點跌眼鏡，好似隻酷派（02369）咁樣環境仲可以由1.3元炒上3.2元，惟有同走雞的看官們「耍個冧」。工信部數據有一點值得參考，內地發4G牌後，生產商全速由2G、3G轉到4G戰線，每百部出廠手機，已經有83部屬4G機種。

由香港56K上網，到今日100M都居然有人話唔夠快的歷史，在高速兼容的4G趨向普及，中國三大流動電訊網絡商，遲早有加價條件，長遠依然值得睇好。

近排「雙馬」四圍買嘢，阿里巴巴入股美國在線零售商Zulily Inc.，轉頭又話騰訊準備收購美國手遊公司Pocket Gems Inc.。阿里騰訊兩大龍頭，高市值高溢價，同銀團要錢易過借火，但搞到唔少中小型科網公司口水長流，希望獲得寵幸的機會，估值亦炒到鬼咁貴。

昨日加埋總理李克強主持國務院常務會議，提出加快高速寬帶網絡建設，全力配合「互聯網+」國策，科網股炒風火上加油。

細價科網股見炒味

但如昨日所指，早一個星期阿里及京東（JD）在美國出季績後，大隻科網股好似金山軟件（03888）同網龍（00777）累積升咗唔少，昨日高位回返落嚟，已經有反高潮情況，真係好嘅唔靈醜嘅靈。不過，資金有分流向其他二三線科網股身上，例如晨訊科技（02000）同金蝶國際（00268），一炒就升20.7%及6.1%。

查實依家屬一線、市值大，基金有貨的科網普遍都幾貴，可惜二三線基本因素又較次，好似晨訊本身無乜新古仔，睇番一一年後業績更蝕足三年，一四年度啱啱虧轉盈，市帳率夠晒平，1倍唔夠去年得0.85倍。講明係高風險，但依家個市又點阻大家去衝浪，一於訂0.58元止蝕跟一跟大隊。

古勝