下個星期，阿里主席馬雲（Jack Ma）會畀女圍，其中一個仲係章子怡。
話說阿里下星期喺佢地頭杭州搞「全球女性創業者大會」，仲廣發咗英雄帖，Sorry，係英雌帖，邀請中外各界成功女性去做演講嘉賓，交流番一招半式。
絲絲一睇呢個武林英雌大會嘅議程，開幕日演講嘉賓個個都係成功女士，咦，但無厘頭走個男人出嚟「壓軸演講」，呢個男人就係馬雲，佢仲係全個會唯一嘅男嘉賓！絲絲知佢係阿里主席……係咪咁想試一次畀咁多女圍？老老實實，有冇公器私用？
睇番今次啲嘉賓，真係好猛料。明星有章子怡、謝西嘉艾巴（Jessica Alba），謝西嘉原來係The Honest Company創辦人之一，賣嬰幼兒用品。仲有《The Huffington Post》創辦人Arianna Huffington，當然亦唔少得阿里系內女高手，好似螞蟻金服首席執行官彭蕾、阿里首席財務官武衞咁。絲絲好想知，馬雲到時點同呢班女士交流？佢會唔會忍唔住偷笑呢可。
余絲韻