絲絲講場：商品大王嫌美國似第三世界
商品大王羅傑斯為咗寶貝女可以學中文，成家由紐約搬去新加坡，唔經唔覺都已經八年。佢有冇啲啲掛住老家？冇，係半滴都冇。
公共設施水平落後
佢話新加坡乜都有，反而返老家，到埗喺JFK機場一Land，就似到咗第三世界機場，要經過第三世界嘅海關，然後就搭架第三世界的士，駛入條第三世界嘅公路，再住喺間第三世界嘅酒店……
得得得，知佢好麻麻老家。佢家陣喺新加坡又確實好開心，熱狗又食到唔使掛，每日喺屋企Home Office，佢話今時今日投資只要有部電腦就得，佢又話自己唔鍾意經常買同沽，一般都會持貨好幾年，所以經紀唔多Like佢咁話。
照咁睇嚟，佢乜都圍繞住屋企？係。投資都唔會佔佢太多時間，佢日常生活幾乎都係兩個寶貝女Happy（12歲）同Bee（7歲），朝早踩單車送兩個寶貝女返學，閒時就同老婆去交響樂會。完全無「悶」呢個字。
羅傑斯當初搬，係為咗畀寶貝女喺一個講中文兼經濟急增長嘅環境長大，所以特登安排寶貝女讀普通新加坡學校，兩個寶貝係校內絕無僅有嘅藍眼珠小朋友，講普通話仲已經Lak Lak聲，可以同地頭蟲同學仔比賽添。羅傑斯對新加坡唯一投訴，就係當地學校功課勁多又深，阿女啲數學深到連佢都唔識教。
老來得女 轉性廿四孝
咪睇羅傑斯依家完全一個廿四孝老竇，其實佢以前好反對有小朋友，仲覺得有小朋友嘅人好可憐添。點知，佢第二次結婚，60歲老來得女，立即轉晒性。話時話，佢都已定居新加坡好幾年，啲普通話點？竟然係一竅不通！唔擔憂，等寶貝女教。
余絲韻