理財Campus：上車血淚史 80後建築師慳出百萬買樓

「艱苦生活係無了期，做咗業主之後，要大汗疊細汗逼巴士、電車、地鐵，三餐喺屋企煮，每個月剩低的錢都只得一、兩千。」網絡短片的對白，道出香港男人的心聲。對80後的Louis來說，男主角更是他的生活寫照，不過，結果卻迥然不同。

Louis建築學碩士畢業，初踏入社會已月入三萬。雖然已有不錯的薪酬，惟當時他未有清晰目標，每月最多僅能儲人工的五分一，消費力絕對不能看小。直至三年前，他面對一個現實的問題︰結婚和買樓。

為娶得美人歸，Louis在結婚前決定放棄人生中第一個「老婆」——私家車Mini Cooper S。「當時我用十幾萬買咗部車，養咗幾年。但為咗儲錢，寧願犧牲自己興趣，連車都賣埋，因為揸車每月都有固定使費，每年又要牌費、保養。如果賣咗佢，每年儲多五萬至六萬，積少成多，就可以慳番十幾廿萬。」

放棄愛車 兼職搬運

男人放棄愛車有多辛苦？Louis笑言︰「唔開心？咁又無，初初有啲唔習慣，但依家都無咩嘢！暫時唔諗住買車，會同太太的屋企人Share一部車用，都可以慳啲開支。」結果，Louis儲了約四年錢，用盡幾十萬積蓄成功娶老婆。婚後租住親戚在將軍澳的兩房單位，月租近一萬元，較市價低兩成。

不過，正如網絡短片中的男主角，婚後不久太太懷孕了。兩夫婦為給小朋友更好的生活，以「應使得使，應慳得慳」為原則，決定開聯名戶口儲首期。除了減少出外應酬外，Louis連出賣勞力的「炒散」工作亦願意做，「例如幫朋友做搬運，更試過搬很重的金屬，做半日多啲外快。」雖然生活逼人，Louis一家仍會每年至少旅行一次。

六百萬樓花撲入市

Louis的太太任職護士，兩夫婦同為專業人士，而且人工隨年月增加，生活質素大有改善，現時兩口子月入近十萬元，月儲三至四萬元。婚後將近四年，他們合共儲得逾百萬首期，成功於去年九月買入將軍澳天晉三期，售價六百萬元，實用面積五百呎的單位，並做八成按揭。

天晉三期為新地一個二十八個月的遠期樓花新盤。Louis未見樓先買樓，直言是因為該樓花較同區二手樓成交價低約一成半，而且發展商聲譽不錯，故抽中即買。

行內人睇樓價難大冧

Louis深明香港樓價難以大跌，故難得抽中新樓便毅然決定上車。「除咗建築物料貴，連工人的薪酬亦增加，市場又有需求，紮鐵、釘板工人的薪金年年都升10至20%。如果每年樓價循序漸進咁升，住屋需求又穩定，樓價好難大跌。」

有樓揸手拒做「租奴」

事實上，建築成本的增幅遠跟不上樓價上升速度。「樓價升得多過建築成本，相比起幾年前，樓價係升咗一倍，但建築成本、人工最多升30%。」

對於《月入三萬的香港人》的男主角，Louis並沒有觀看過有關短片。不過他表示，「做樓奴當然辛苦啦！但如果一直做租奴就更加辛苦。人最緊要有瓦遮頭，就算唔買樓都要租屋，但租金愈來愈貴，兩者支出差不多錢，但租金就好像白白使咗去，到頭來就咩都無，而且是無止境的。」

Louis儲首期慳家大法

•賣掉愛車，節省每年養車費約五至六萬

•減少出外應酬，透過社交媒體與朋友保持聯絡

•爭取賺「外快」機會，甚至出賣勞力兼職搬運

•租住親戚單位，租金較市價便宜兩成

•與老婆開設聯名戶口，每月最少儲三至四萬元