股民炒股要跟住個「勢」，估唔到連上市公司一樣要跟。話說上海主板上市公司「多倫」，做開房地產，忽然尋日出公告話要改名「匹凸匹」打算轉型，齋睇名唔曉佢做乜？內地上市梗係用普通話讀，「匹凸匹」即係「P2P」，扮晒互聯網金融股，食住「互聯網+」個勢。
結果？結果係尋日開市無耐就升停板。
雖則佢哋喺公告話「立志於做中國首家互聯網金融上市公司」，但話佢哋「扮」，一啲都唔過分。連上交所都覺得要問個明白：轉型業務展開咗未？無。人員配備咗未？無。可行性論證有喇卦？都無。有啲乜？有個「www.p2p.com」嘅使用權，公司話「業務轉型尚在設想階段」。咁都得？十幾年前香港一樣有N間公司改名扮科網股。
余絲韻