絲絲講場:友邦AGM粉絲狂笠高帽

又到業績期,係時候小股東去股東會探吓啲愛股,順便食番幾嚿燒賣。講到對愛股嗰份熱情,點都唔夠友邦(01299)嘅小股東犀利。嚴格嚟講,已經去到粉絲級數。

天未光扮靚赴會

尋日友邦開AGM,有位小股東喺問答環節成功搶到咪,好開心咁同管理層講,話自己朝早五點半,天未光就已經起身扮靚靚準備赴會。冇錯,佢真係話五點半,咁友邦股東會幾點開始?係十一點。呢位「友邦粉」白衣白帽白短裙,仲有飄逸白絲巾。呢份心思,睇得出;呢份「神心」,同去Dating都差唔遠。

呢位「靚靚友邦粉」仲話,揸住友邦股票好安心,皆因佢嘅愛股可以話係保險界嘅「航空母艦」咁話。叫得做粉絲,當然唔係齋理股價,「靚靚友邦粉」仲好窩心,佢見在座各位管理層都有番咁上下年紀,特別請佢哋保重身體,唔係點繼續駕駛「航空母艦」咁話。若然友邦首席執行官兼總裁杜嘉祺(Mark)曉聽普通話,就原汁原味Feel到嗰份「愛」。

周松崗似招財貓

友邦班管理層有幾受歡迎?佢哋位獨立非執董兼港交所(00388)主席周松崗,簡直就係招財貓。有位友邦小股東話買親股票,只要一有周松崗坐鎮股東會,股價就必急升。呢位男忠粉仲情不自禁同周生講咗句「I'm happy to see you!」連阿Mark都話,友邦業績好,加埋周生坐鎮,股價唔升都幾難!但派息就半年一次喇。

余絲韻