絲絲講場:電盈小股東要買NOW TV

早前有人向運輸署申請「NOW TV」自訂車牌,邊個想「買起」NOW TV?原來係電盈小股東聯盟成員陳仲翔,佢周不時都喺股東會上提問,電盈(00008)及香港電訊(06823)尋日開股東會,絲絲又見到佢喇。

申請車牌做開台禮

做乜搞到買起NOW TV個牌?唔好意思,係車牌。陳小股東話政府公布正式向電盈旗下「香港電視娛樂」發免費電視牌照消息,佢興奮到成晚失眠,索性自己掏荷包攞5,000蚊出嚟,去申請個「NOW TV」車牌,佢話打算喺正式開台時,送畀個免費電視做賀禮喎。佢又話自己係球迷,希望第時電盈個台可以免費播英超。

絲絲所知,申請還申請,個牌未必一定到手,事關仲要經公開競投,到時有人爭咁點先?陳小股東即刻話自己只係打工仔,財力有限,若有人爭,但望阿電盈主席李澤楷出錢幫幫手。

李主席又點睇陳小股東呢份心意?主席話要研究研究,先評估一下買呢個車牌嘅宣傳效益。計絲絲話,車牌都未買,已經有啦。

余絲韻