絲絲講場:客仔戴口罩 銀行點反應?

入到醫院診所會有溫馨提示叫人戴口罩,有啲地方要入就首先要除口罩同頭盔,邊處?就係喺台灣嘅銀行,其實已經實行咗好多年,話說當地多年前發生啲都幾大嘅銀行械劫案,匪徒就係戴口罩犯案,為免再中招,自此當地嘅金融機構要求所有人入銀行一定要真面目示人。

上個月尖沙咀單持械搶錶案,個賊戴假髮與口罩「易容」出動,聽講佢之前喺深圳做世界時仲出動到「人皮面具」。咁香港銀行有無類似台灣嘅規定呢?絲絲問咗幾間銀行,當中恒生嘅回覆係「基於保安理由,我們未能提供相關資料」。

港滙豐保安最有警覺

既然問唔到,絲絲上個禮拜就索性親身試,戴住口罩入咗中環六間銀行,包括滙豐、恒生、中銀、渣打、富邦同花旗。無錯,戴口罩,香港其實見慣,銀行無特別留意係預咗。嗱,有反應就反而係意料之外!就係滙豐,佢哋位保安姐姐特登走過來望吓絲絲,仲笑笑口同絲絲講咗句「你好」添。呢位保安姐姐警覺性咁高,要畀個Like。

余絲韻